其實第一次睇新感線係無幾耐之前既事，都係因為最近沉迷睇歌舞伎期間唔覺意睇左幸四郎主演既《朧の森に棲む鬼》，舞台場景同空間運用仲有殺陣以當時黎講真係好出色，古今融合洽到好處，劇情亦相當大膽露骨
而髑髏城其實已經公演過好多次，名符其實係新感線既劇寶，最元祖版本係古田新太主演，萬萬無想過原來佢係新感線既台柱黎w
2004年就有〈アカドクロ〉同〈アオドクロ〉兩個版本，前者依然係古田主演，後者由幸四郎主演，以上版本都係由佢地一人分飾捨之介同天魔王兩個角色，係YouTube有〈アオドクロ〉既歌舞片段，不過本人一向對歌舞劇抵抗力低，一聽歌就會起晒雞皮出晒戲，所以今次係戲院上既〈ワカドクロ〉版本比較合我口味
同之前兩個版本最唔同既就係歌舞橋段砍晒，捨之介同天魔王分開兩個人演，套劇應該變得流暢左，個個都有足夠時間發揮無厚此薄彼
選角方面都幾無敵，小栗旬、早乙女太一同森山未來將捨之介、蘭兵衛同天魔王呢三個角色演繹到一個其他版本都幾難超越既高度—
太一演既蘭兵衛有種其他人散發唔倒既淒美，殺陣動作超華麗可以用行雲流水黎形容；森山講對白既節奏加埋佢既顏藝，演繹出其他天魔王冇既果種陰險卑鄙既一面，同時都不乏笑點；
至於捨之介算係一個比較易塑造既角色，其他版本既捨之介都有自己獨當一面既風格，只要唔係同旬哥比風流倜儻既話w
角色雖然多，但每個人都發揮得好好，特別演兵庫既勝地涼，由於ワカ既贋鐵齋由高田聖子飾演，所以一邊殺陣一邊磨劍一幕變成由兵庫拍檔捨之介，超有默契超好笑w
舞台場景搭得好靚，但係戲院睇就覺得個舞台好窄，大概因為有太多場景要換吧，雖然睇落係細但就凸顯左空間運用既奧妙，好似攻打髑髏城一幕靠樓梯同演員走位配置營造到逐層打大佬既感覺，好精彩好有心思
後來我搵晒6年後再公演既〈花鳥風月極〉版本黎睇，咁當然只係跳住黎睇啦畢竟人生冇咁多個三小時嘛
原來IHI stage around東京落成後，〈花鳥風月極〉係處女show，呢個場既舞台同觀眾席都係可以旋轉的，亦因為舞台只要旋轉就可以轉換場景，再加埋投影設備，做到好多比之前版本更精彩既舞台效果，特別想推薦一下Season〈鳥〉同〈極〉
Season〈鳥〉由太一同森山飾演返蘭兵衛同天魔王，佢地兩個既演出比2011年仲要更上一層樓，而由阿部貞夫演既捨之介亦由浪人呢個設定改左做忍者，變得好符合佢風格，歌舞部份都回歸，睇完先知原來係Mikiko振付擔當，瞬間覺得好厲害w松雪泰子演既太夫都超靚唱歌好好聽，場景佈置相當精美，仲有捨之介搵贋鐵齋打造斬鎧劍一幕超級好笑www可以話係風鳥花月之中最可以同2011年版平分秋色既版本
而Season〈極〉係冇左捨之介同蘭兵衛，天海祐希演既太夫基本上就係三個角色既結合版，超級壓場！最特別既地方係新感線完美地利用舞台可以360度旋轉呢個特點來製造回憶走馬燈既效果，睇到我起晒雞皮
所以只要睇過一次新感線就明白點解會咁受觀眾同一線演員歡迎呢
沒有留言:
發佈留言