【歌舞伎】跟市川猿之助學獅子毛振り

近排經常係綜藝節目見到猿咕碌身影，每次佢係IG出工作story大概代表又有節目上，佢自己都講過《半澤2》熱潮為佢帶來最大既影響就係多左好多綜藝演出既邀請，而且大部份話題都係圍繞佢演一座山時既「詫びろ x N」「お前の負け！！」scene，睇得太多我都覺得膩啦，但感覺佢本人仍然好樂在其中😅

最近呢次上《出川と爆問田中と岡村のスモール3》終於比較有意思，雖然之前其他節目都有提及歌舞伎既話題，但頂多都只係懶人包，今次居然係要教三個半百大叔學《連獅子》毛振！其實猿咕碌本人講過只鐘意做演果個唔鐘意做教果個，所以實在係好笑得黎又相當難得

係綜藝節目演《連獅子》都算係破天荒啦

由於上一段既嘉賓大泉洋炒個飯炒左足足一個鐘關係而搞到SMALL3遲大到，仲要開波無耐出川大叔話比起「呢樣野」(指歌舞伎)想講半澤多D，雖然知佢係講笑咁講，但其實真係幾失禮，歌舞伎係嘉賓既本業黎架嘛💦猿咕碌本身11月演蜘蛛精已經好攰架啦，真係陰公豬

關於《半澤2》，其實之前佢都有係其他節目講過，大結局果晚撞正柚子網上live所以冇睇到，話晒悠仁係猿咕碌既大親友嘛。至於係劇裡面加入歌舞劇要素呢方面大概都係導演既要求吧，畢竟第一季有咁大迴響，演員們用燃燒生命程度既誇張演繹始終係重點之一。猿咕碌仲不忘多謝大家對《半澤2》既厚愛，而家既佢比起岩岩襲名果陣少左份少爺氣場，畀人感覺圓滑左好多呢~

仔獅子團子

進入正題！換左浴衣既大叔們首先要學滑步同見得，用左年頭公演既片段做範例，難得可以見到團子❤️田中大叔同岡村大叔確實好比心機學，而出川大叔則由頭到尾都係處於搞事狀態w到學fing毛時亦為佢地準備左稽古用既黑頭毛，戴左黑頭毛之後三個身長只有160既大叔們睇起上黎好似企鵝，好趣緻www本來我以為最多都係學到呢度為止，冇諗過之後真係化埋妝同換正式戲服演出，其實要保養獅子戲服應該相當麻煩，估唔到竟然勞師動眾到呢個程度…

的確，對於呢一代既役者們黎講，推廣歌舞伎都係佢地重要既任務之一，任重道遠。作為澤瀉屋既當家，呢一方面猿咕碌真係一D都冇馬虎👏🏼

極速隈取

之後大叔們就睇猿咕碌示範自己上妝，然後再由弟子們先為佢地搽底油同白粉，再畀佢地自己畫隈取。出川大叔蠟眼眉時喪嗌好痛真係勁煩XD，之所以點解役者們通常都寧願選擇犧牲色相剃自己眼眉，除左方便之外就係為左免受呢D皮肉之苦w而平常上鏡畫晒眉咁都係因為冇左堂眉而唔係為貪靚架。見到出川大叔既隈取我當堂噴笑左出黎🤣猿咕碌話佢畫到似Joker，我反而覺得佢睇落似Q太郎多D囉

最後既見得 XD

換完戲服就正式表演了，本來我一向覺得無論邊個都好，演得獅子精就會自動帶帥氣buff，猿咕碌既親獅子當然不在話下，只係一見到三隻半百仔獅子出場既畫面，就算表情好認真都依然係好好笑，尤其每次影到出川大叔果陣😂三個之中我認為fing得最好既應該係田中大叔嘞，至於出川大叔果然不意外地去到中段fing唔倒要偷雞用手🤣不過到呢個年紀先學fing獅子毛都算係咁啦，見到猿咕碌威風凜凜既毛振身姿，證明歌舞伎役者真係個個都練習有素好腰好腎w

【歌舞伎】那夜我在中央圖書館觀看《京鹿子娘二人道成寺》

關於《京鹿子娘道成寺》故事背景——

安珍與清姬

安珍與清姬是流傳在紀州的傳說。主人翁是來自奧州要到熊野參詣的僧人安珍，和他在紀伊國寄宿家中的少女清姬。內容描寫清姬愛慕寄宿的安珍，在遭到背叛後化身成蛇，將躲藏在道成寺之鐘裡的安珍燒死的故事。

- from wikipedia

自始無論如何點樣再興建大鐘，都會因為清姬既怨念而遭受破壞 經過幾百年後，此時櫻花爛漫既道成寺，已經唔知第幾次新建既大鐘又再次落成，一群和尚開始到寺為大鐘進行法會。呢個時候白拍子花子出現，希望入寺供奉大鐘，為左保護大鐘其實已經唔再容許女人入寺，但和尚們見門外香香既花子美貌如此出眾，於是對佢進行左一場禪問答以測試品格，聰慧既花子唔止對答如流，仲反過來問到和尚們口啞啞，結果甘敗下風既和尚們以花子要戴住烏帽子跳舞作為條件允許入寺。花子一連串華麗既舞蹈令和尚們睇到入晒神，但呢群傻豬豬意會唔倒花子既舞蹈裡面充滿情愛之意，其實花子一早已被清姬附身，藉跳舞接近大鐘，和尚們察覺唔妥時已經太遲無法阻止。最後大鐘跌下來，花子化身為大蛇盤踞係大鐘上

隨便搜一搜都有唔少玉三郎既跳娘道成寺片段，尤其是YouTube呢條真係不得之了呀，仲有當時仲係用緊本名孝夫既仁左衛門，係90年代極之人氣既郎才女貌「孝玉配」🤗不得不感嘆玉三郎後生時已經對細節野有咁多考量，果種比女人更柔軟纖細既型態如此成熟。係二人版本中玉三郎造詣之高變得更明顯，不過創作二人版既原意就唔係用黎比較，所以我絕對冇覺得菊之助跳得唔好既意思呀😣本來菊之助師承老豆既女形已經做得相當好，再加埋有玉三郎指導，型態美比起好多役者要出色，只係同得玉三郎同台難免依然睇得出分別，玉三郎每次望向大鐘時真係連眼神都有戲

※ 有關呢部劇目既技術性註解，可參考歌舞伎への誘い(中文)

「二人の花子が時には一体となり、時には陰と陽のように、あるいは姉妹のように踊るという」

二人版本編排就如呢段簡介一樣，我覺得甚至更加具現左故事背景，例如一開始菊之助係花道一段，玉三郎突然係suppon出場，二人動作慢慢同步起來，然後菊之助前往道成寺時玉三郎又係suppon退場；以係suppon登場既角色都唔係人類既呢個概念，製造一個花子就係呢個時候被清姬附身既觀感效果。而且二人共演都減輕左表演者既負擔，畢竟要著住咁多重振袖跳一個鐘頭舞一定相當辛苦

睇完更好奇2016年既清姬怨念五倍加乘版《京鹿子娘五人道成寺》到底會有幾精彩😂

圖書館有得睇？？

有感關於歌舞伎既中文資訊太少，於是查下圖書館會唔會有書可以參考下，結果書就少得可憐，反而影音資料比我想像中多。其實我一直都未用過圖書館既MMIS(多媒體資訊系統)，趁有時間所以就試下。不過原來MMIS都幾唔user friendly，DVD館藏無做到數碼化，而且只得中央圖書館有，所以必需要預約中央圖書館既MMIS，模式好似幾廿年前既K房一樣咁古老…雖然對於身處大西北地區既我係有D遠水路，好彩巴士站落車行去都近，於是我就有一個大膽既想法，諗住第時放假冇野做就可以有個地方打墩

不過滿心歡喜認領左預約既館藏，到播放出黎一刻我係灰左既，估唔到畫質竟然好似睇緊YouTube 144p咁……天呀！雖然係DVD者，點解都可以壓到咁低架？？？？？望住起晒格既玉三郎同菊之助，我真係欲哭無淚😢不過因為係DVD所以有日英副聲解說可以揀，而且有D資源始終係網絡上搵唔倒，所以之後應該會再去…既

【歌舞伎】三人吉三

衝住中村屋而睇既三人吉三

初初見到勘九郎七七同尾上松也係涉谷拍既現代風畫報，搞到以為只係三個都叫吉三既結義兄弟物語，諗住應該會係中村屋拿手果種輕鬆搞笑劇目，估唔到劇情繼續發展落去原來急轉直下，係C9們最鍾意果D因果報應既狗血劇情黎，三個吉三既下場好悲慘

三人吉三 - 開場

故事原名叫《三人吉三廓初賣》，現時歌舞伎經常見到既《三人吉三巴白浪》為第二幕（大川端庚申塚の場），三個吉三係兩國橋結拜既名場面(白浪物 - 即係以盜賊為主題)，而お嬢吉三搶走百両及意外得到庚申丸後，係月光下一段厄払い獨白，係河竹默阿弥眾多著作中數一數二名台詞

三人吉三 - 大川端庚申塚の場

三人吉三 - 割下水伝吉内の場

串田和美既舞台真係要用美不勝收黎形容，Theatre Cocoon唔算大但舞台佈置同燈光營造得相當有電影感，例如お嬢同お坊係橋上大打出手（大川端庚申塚の場）、伝吉自爆過去（割下水伝吉内の場）同最後三人自盡（本郷火の見櫓の場）呢幾幕，特別最後一幕場雪景戲短短十幾二十分鐘，我諗紙吹雪用量分分鐘用噸計，仲出現左兩次大"雪崩"來表現悲壯感，坐前面幾行既觀眾可以話完全融入左劇裡頭，全身上下都鋪滿厚厚積雪w真係辛苦晒負責清理既人員啊

吉三們既服飾比起平時歌舞伎既服飾用上更鮮明既紅藍黃綠色，亦同其他角色低調配色形成強烈對比，突顯三個主角同時，配色依然符合角色身份；Cocoon版有時候配樂會用上結他，將現代舞台融入歌舞伎應該係呢個版本獨特之處吧，2007年勘三郎版本甚至用左林檎姐既《玉手箱》作結尾㖭

本來就為左美七七而睇呢套，不過感覺有D可惜，佢既お嬢冇中村福助反差咁大，又冇玉三郎咁傲嬌；勘九郎既大佬吉三演得好夠悲壯，有時真係好有勘三郎影子；至於尾上松也比想像中好，但可能上左妝問題，好多時佢驚訝既表情比較似發呆多w整體而言，明明三位係幼馴染，竟然冇長輩們既演出咁放得開，但畫面靚，靚可以蓋過晒你地既唔完美☺️

三人吉三 - 巣鴨在吉祥院の場

三人吉三 - 巣鴨在吉祥院の場

由於劇情比較複雜關係，唔再用篇幅說明了，曾經睇過台灣劇迷既中文講解，有興趣可以Google一下。如果唔想睇咁多字，可以睇下木ノ下歌舞伎版既人物關系圖作簡單了解。總之呢個係由一把刀同一百両，好似蝴蝶效應咁所引起既連串悲劇故事。。。

至於本人最鍾意既一幕就係當一切真相大白時，和尚吉三寧願殺死自己既親弟妹(本來唔知對方存在但卻意外相戀既龍鳳胎十三郎同おとせ)，拎住兩顆頭臚出黎決定用來代替お坊同お嬢頂罪，一來為免弟妹繼續墮落畜牲道，二來希望讓お坊お嬢得以重生，結束老豆伝吉一手造成既冤孽，呢一幕真係有震撼到我。但到最後三人自知道難以突破官兵包圍決定自我了結時竟然滿滿吐槽點wお坊同お嬢互刺之後，兩個大男孩死前仲要互相依偎咁甜囉，喂呀你地望下大佬一眼好冇？難為大佬犧牲左咁多，切腹氣絕前仲將自己件衫蓋係佢地兩個身上，大佬你真係偉大得黎又淒涼啊😭

最後以渣渣日文+渣渣中文譯左お嬢段厄払い，本來用左玉三郎演既片段做左個小字幕短片Up上IG，但越睇越覺得翻譯得差，所以就唔貼出黎，放個修飾左既文字版係呢度好了

月も朧に白魚の篝も霞む春の空
冷てえ風も微酔に心持よくうかうかと
浮かれ烏のただ一羽塒へ帰る川端で
棹の雫か濡手で粟
思いがけなく手に入る百両
ほんに今夜は節分か
西の海より川の中
落ちた夜鷹は厄落し
豆沢山に一文の銭と違って金包み
こいつぁ春から縁起がいいわえ

朦朧月夜下捕魚的篝火在初春的天空騰升
冷風令微醉的心迷迷糊糊的
往河另一端歸巢的一只烏鴉
簡直就像不勞而獲似的
無意間百両入手
原來今晚正值節分
把剛才的夜鷹當成厄運推落隅田川流向西面的海
這包包跟平常和很多豆子一起包住的一文錢可差得遠了
真是吉兆由新春開始